广州新亚大酒店繁华太平南嘅沧桑背影

原标题：新亚大酒店：繁华太平南嘅沧桑背影

新亚大酒店，1920年代初由归国华侨集资兴建，1927年正式开业，系广州最早嘅新式酒店，曾接待李宗仁、孙科、张发奎、余汉谋、郭沫若、茅盾、夏衍、欧阳山等政界要人同知名文化人士。作为1920年代广州屈指可数嘅最豪华、最高级嘅大型酒店，因高品位、高格调嘅设施同服务，喺省港澳一带享负盛名。今次，记者采访到新亚大酒店黄保华书记，同佢倾倾新亚迈住沉重步伐匍匐向前嘅艰辛。

最早新式酒店，树立行业规范

南都：新亚系广州最早嘅现代酒店，初建嘅时候系点样口架？

黄保华：一开头呢度并唔系酒店，你睇个格式，都唔似系用嚟做酒店。呢栋建筑叫做“南华楼”，1926年，为配合省港大罢工嘅形势，刘少奇仲喺四楼开设过劳动学院，培训工人运动干部。后来由于政治形势变化，到1927年4月被迫中止。随后，新亚大酒店开业，两年后开设香港、上海分店。

南都：呢栋楼嘅建筑风格同隔篱新华大酒店好相似，其实究竟系咪姊妹楼嚟嘅？

黄保华：呢两栋楼都系嗰个时期起嘅，但系究竟系咪同一个大师嘅手笔，我哋就唔确定。听讲呢栋楼嘅设计师系英国嘅，中西合璧嘅风格，喺当时嚟讲都叫做系比较有代表性。初头起系八层，后来到1970年代嘅时候加建咗两层。

南都：新亚嘅招牌系于右任题嘅字，当时系咪比较多国民党高官光顾？

黄保华：关于呢样嘢，历史资料上记载极少，但系先嗰牌有个台湾客人过嚟新亚参观，佢嘅父亲，系于右任嘅手下，听佢讲，佢爸爸确实曾经将当时嘅新亚、东亚两间酒店包落嚟，招待咗好多国民党高官。

南都：到1930年代，太平南路至西堤附近，就起咗三间新式酒店。同新华大酒店、爱群大酒店相比，新亚有咩特色？

黄保华：新亚以接待文人雅士居多，郭沫若、茅盾、夏衍、欧阳山、蔡楚生等文化名人都嚟住过。当时新亚嘅酒店管理，系“十诫十要”同“三不接”，即系对客人嘅贴身式服务同埋唔接黄赌毒，嗰时嚟讲系比较先进嘅。广州最早嘅新式酒店制度同规范，基本上都系按照新亚嘅酒店管理规则而定下雏形。后来嘅东方宾馆、中国大酒店等等，都借鉴咗唔少我哋嘅酒店管理规范。特别系“三不接”，当时几乎得新亚系咁样做，直到而家依然沿用。

南都：点解新亚可以作为制定新式酒店管理标准嘅酒店？

黄保华：新亚大酒店嘅第一任经理钟标系云浮人，读私塾大嘅，但系佢留过洋，去到西欧学习酒店管理同餐饮管理嘅方法。嗰个年代，广州虽然系最早开放嘅城市，但喺酒店行业起步比较迟。新亚酒店作为广州最早嘅现代酒店，从内到外，都系当时最好、最先进嘅。当时嘅拉闸手动电梯，1982年装修卖咗畀濠畔街一间公司，听讲而家仲存在。当时新亚系广州最豪华嘅酒店，先进嘅酒店管理模式自然可以作为行业标杆。新亚当年之所以有名，一个系设施先进，二个系贴身式服务。所谓贴身式服务，系事无巨细，连洗衫、擦鞋、挂衣帽、凑细路、买烟等生活琐事，都有服务员代办。特别嘅系，当时呢度好多水上人家，钟标觉得疍家女比较勤力，所以就招咗一批疍家妹喺酒店度搞卫生，以细致、干净著称。

经得住风云，抵不过时间

南都：抗战爆发之后，广州沦陷，对新亚有冇损毁性嘅破坏？

黄保华：据闻日军系有进驻新亚，因为呢度属于制高点。某程度上嚟讲，肯定系对经营有影响，但系具体咩情况，就唔系好清楚。香港嘅分店，系喺呢个时候停业，从此得返广州、上海嘅新亚。

南都：1949年之后，新亚有冇咩变化？

黄保华：公私合营之后，贴身嘅家庭式服务，都系有传承落嚟嘅。一路经营落嚟，从1950年代到1970年代初，因为整个供求关系偏向酒店呢方，成个广州都冇几间酒店，而呢度又系广州设施同服务都档次比较高嘅酒店，当时喺省港澳相当有名，所以人哋要嚟，都系要求住你开房口架，仲要打批条，就算你系总经理都唔能够卖大包，一路都唔忧做口架。1980年代开始，先至陆续有新嘅酒店出现，所以我哋嗰阵时先至开始改革。

南都：当时嘅改革，新亚系咪比较早嘅实践者？

黄保华：可以咁讲，1982年嘅时候，我哋系率先改革嘅。当时因为好多新酒店陆续兴建，由于竞争，所以率先将新亚改造成现代酒店，进行全面大装修，设备全部用进口。特别值得一提嘅，系我哋用嘅三菱电梯，质量相当过硬，从1982年使用到而家。你唔好睇电梯系嗰个年代嘅，我谂就算而家好多新嘅电梯，质量都唔及佢，钢材非常好。所以用咗30年，都仍然喺度运行。当时白天鹅酒店、中国大酒店都未有，整咗之后，生意好旺。整个西濠二马路，不夜天嘅繁华，唔少得新亚嘅贡献。一路旺到1988年，先至开始走下坡。

南都：走下坡嘅原因系乜嘢？

黄保华：1988年到1997年，呢段时间算系新亚比较低谷嘅时期。因为好多大型嘅高层酒店蒲头，加上人民南高架兴建嘅影响，一路低沉。而且，经过咁多年，客房开始残旧。按照酒店维护嘅正常周期，6年就要装修一次，如果唔投入资金，就会相当残旧。后来我哋喺1998年再重新投入装修，先至以另一个全新面貌出现。不过到而家，又系十几年冇装修过喇。要投入资金又唔系咁容易嘅事，我哋同爱群系广州最早获得“中华老字号”认证嘅酒店，但系广州市扶持老字号嘅政策，我哋基本上冇享受过。因为我哋始终庙细，冇人睇得上眼。但系我哋即使冇办法投入资金进行大装修，都尽量做好保养，做到残而不破，破而不旧。虽然十几年冇装修，但系因为保养比较畀心机，而家基本上都睇唔出系十几年冇装修。

南都：即系喺有限嘅范围，尽量保持新亚嘅层次？

黄保华：系啊，我哋可以讲系尽咗我哋最大嘅努力。因为要控制成本，原来新亚有二百几个员工，到而家得六十几个，一路裁人。当然，以前系有餐厅嘅。新亚以前嘅西餐厅同九重天中餐厅系好有名嘅，但系而家租咗畀人，因为我哋整个成本运作冇办法同私人竞争。而家我哋实际上就系纯旅店，但系，国营老酒店仲能够喺今日嘅竞争中捱到而家，我哋都唔容易口架喇。

天时不再，地利仍在

南都：而家新亚喺客源方面，点样保证一定嘅开房率，维持经营嘅稳定？

黄保华：近十年，好在周边建立咗几个专业市场，对我哋客源嘅辐射，起咗好好嘅作用，就稍为变得好啲。十三行服饰批发市场、文苑电子批发市场、一德路海味批发市场、上下九附近嘅玉器批发市场，我哋主要吸纳呢部分嘅客人，目前嘅服务主要系专为呢类客源量身定做。

南都：新亚嘅客源，从以前文人雅士为主，到而家专业市场商务为主，呢个转变有冇令到新亚嘅企业文化有所改变？

黄保华：酒店嘅定位，系随住客源嘅变化而变化嘅，呢个系冇办法嘅事。我哋而家面对嘅系专业市场，呢啲人就系过嚟攞货，唔会在乎你有乜嘢文化。因为呢个地段嘅氛围，仲想吸纳注重文化嘅客，可能会有难度。我哋以前系省港澳嘅客源，而家都仲有一两个老一辈嘅港澳台胞客，每一届嘅交易会仲追住新亚嘅历史嚟住。仔女冇办法，逼住过嚟，因为唔放心老人家。嚟到之后，佢都要同仔女交代，除非我走咗，你可以唔嚟新亚住，但系喺我走之前，你仲系要嚟新亚。但系佢哋仔女嚟到，就会觉得新亚残旧，入到嚟好似旅馆咁，所以喺老人走咗之后，佢嘅下一代唔会想住过嚟呢边。所以，老酒店一定要开拓新市场，一定要创新。当然，管理模式整个方向系冇变嘅，以前系贴身式服务，而家都系家庭式服务。

南都：如果话新亚而家嘅定位系要做中端，离唔开文化，但系而家所针对嘅专业市场客源，可能并唔在意呢样嘢。

黄保华：唔在意，都要讲。而家我哋对新亚，第一系要推广我哋嘅文化，第二系要延续以前嘅服务。我哋而家人力减少咗，但系尽力做到，而家已经好少有“见人”嘅服务，我哋仍然每层都有服务员喺度，服务员都系年资比较老嘅，佢哋虽然唔系年轻貌美，讲嘢大声小小，但系好亲切，笑容唔系公式化，而系出自对客人嘅真心。所以客人有好多都觉得仲系接受我哋呢种服务，觉得嚟到有屋企嘅感觉。

南都：但系有一种做法，就系打造一个文化精品酒店，专门针对有呢方面文化需求嘅高端客人。

黄保华：其实我哋都想行呢条路，但系行唔行得通、点样行、客人点解要嚟你呢度，一系列嘅问题都要研究。解决唔到，就仲系要实际啲。我哋而家嘅定位系中端酒店，所有工作都要精细化管理，将贴身式服务做得更细。按照我哋做一线基层嚟睇，我觉得始终系要做专业市场，如果唔系，好难生存。所以，我哋仲系要定位，冇定位就冇未来。实际啲嚟讲，如果专业市场搬走，我哋好难生存。其实真正做生意，都系睇市场。如果你唔睇市场，盲目去投入，一个亿都冇用。如果仲系以前文人雅士嗰种谂法，我觉得唔现实。当然，承传文化系要嘅，而家每个楼层都有酒店文化展示，保留以前嘅服务模式都冇问题。

南都：作为老字号，新亚究竟喺而家呢个时代中嘅价值系乜嘢？

黄保华：其实连我自己都觉得，老字号新亚系又残又旧。但系，佢仲有一个历史文化嘅价值喺度，社会影响同名气都仲有。只不过，随住时间推移，可能会逐渐淡化。而老字号更多嘅价值，系品牌同埋商誉，所以宣传同推广酒店文化系必要嘅。而家市政府、媒体成日话帮助扶持，但系实际上嘅帮助唔大。而家增值老字号，我哋会从中端定位开始，将新亚推广到社会，拉高老字号嘅档次。我哋准备升为三星级，咁就需要硬件方面嘅投入同人员配备整体素质嘅提升，我哋仲喺度努力紧。但系有三个瓶颈，一个系餐厅，二个系停车，三个系配套，都系老大难嘅问题。

采写：南都特约记者冯璐赟

特别鸣谢：广州老字号协会

记者手记

挡不住时光之流滚滚东逝

记忆非常深刻，1997年8月31号，我喺新亚大酒店九重天同屋企人饮茶，大人喺度谈论当日发生最大嘅事件———英国戴安娜王妃魂断巴黎。当时我11岁，戴安娜系当时嘅我所认为最靓嘅女人。人民南昏暗嘅光线同美人嘅灰飞烟灭一齐，组成我对新亚记忆嘅一部分，沉重又黯淡。

16年后嘅采访，安排喺新亚二楼后座办公室，行入新亚，大堂扁窄，格局逼仄，进入办公室，白炽灯之下灰暗残旧，几张办公台摆埋一起，旁边围住几个大文件柜。见到今次嘅受访人黄保华书记同两位年轻嘅经理。黄书记话，一共三个人，就系新亚而家嘅班子喇。见我有啲惊讶，佢笑笑口自嘲：而家控制成本，基本上就我哋三个搞掂，所以乜都要做，好似打杂咁。

令我更加有落差嘅系，黄书记对新亚嘅历史，已经唔系太了解。黄书记虽然年资高，算系新亚最老嘅员工，但系，其实喺新亚做咗廿几年，而且一直做财务，系近几年先做经营管理。佢无奈咁讲，好可惜，熟悉新亚历史嘅老员工，最近一年间，都陆续离世，唔系嘅话，你或者可以采访到更多有意思嘅事。而新亚嘅历史资料并唔系好多，佢哋对新亚历史嘅了解，都系仅仅嚟自于有限嘅文史资料，而资料嘅保存亦都系一个问题。

喺之后嘅倾偈过程中，我当然为新亚如今不复当年盛况而叹息，亦同新亚人一齐为点样喺夹缝中生存而发愁，但一直横亘喺内心嘅，系酒店历史喺新亚人当中传承断层嘅唏嘘。当然，欣慰嘅系，新亚人喺度努力。酒店每层会客厅，都有酒店历史嘅介绍同旧物嘅展示，1930年代用过嘅铜质香巾篮同铜质咖啡壶、“八重天”用过嘅英国制造瓷碟、当年嘅工号牌同行李牌、第一任经理钟标制作嘅酒店刊物《做人》影印本……尽力保留落嚟嘅呢啲嘢都非常珍贵。每层嘅服务员，都非常亲切，虽然佢哋唔系年轻貌美，讲嘢稍微大声啲，但系笑容同问候都系发自真心嘅，呢种家庭式嘅服务，确实系新亚流传落嚟嘅瑰宝。但系，当我行出八楼会客厅落地窗，望下边人民南嘅街景，高架上嘅滚滚车流，早已用速度将当年繁华碾碎。往南望，珠江水依旧，从前叫“太平南”嘅呢条路，早已面貌全非。

临走嘅时候，黄书记话，佢明年就退休喇，新亚将由年轻人掌舵。我心内光线瞬间明灭，暗自觉得，新亚嘅历史文化，将随住后浪潮涌湮灭。但系，历史唔系就系咁样前进嘅咩？所以先至有一句话，人间正道是沧桑。